RDC: Tango mabina ebongoli pasi na espoir na Kivu

Na Nord-Kivu, etuka oyo ebebisami na bitumba ya minduki, etuluku moko ya bana bazongeli elikya na nzela ya mabina. “Invisibles Kids Academy” ezali mingi koleka mosala ya ntɔki. Mpo na bilenge wana ya mbula 6 tii 18, oyo mingi kati na bango babungisaki balingami na bango to bamonaki mobulu, mabina ekómi nkisi mpe kolela mpo na kimya. Na nzela ya mouvement moko na moko, babongoli traumatisme na bango na art, kopesaka mokili nsango ya nguya ya koyika mpiko liboso ya bitumba.

Kobina mpo na kobika na oyo ekoki kolobama te

Innocent, ya mbula 10, azali moko ya bana oyo mpo na bango kobina ezali mingi koleka kominanola. Orphelin mpo na bitumba kati na mampinga ya Congo na batomboki ya M23, azuaki ekimelo na académie oyo. Alobi boye: “Ntango tata na ngai akufaki, mama na ngai akokaki lisusu te kokokisa bamposa na biso. Lisolo na ye, lokola oyo ya bana mingi mosusu na etuka, ezali na bosolo ya molili, kasi mpe elikya ya bomoi oyo emonisami na estrade.

Mokeli ya académie yango, Bush Séba, alimboli ete mabina ezali lisalisi se moko oyo ekoki kozwama mpo na bana wana oyo bazali na mpasi ya motema. Alobi na nkuku na ye: “Ntango bazali kobina, babosanaka makambo nyonso mpe bazwaka bonsomi ya kobimisa makanisi na bango.” Elakiseli mokomoko ekómaka mosala ya kotɛmɛla mobulu oyo ezali bisika nyonso, lolenge ya koyebisa mokili ete kimya ekoki kosalema ata na bisika oyo ebebi mingi.

Art liboso ya inaction ya bakonzi

Lokola académie ezali kobunda mpo na kobika, kozanga misolo, mingongo ezali kobima mpo na kosenga lisungi mingi na bakonzi. Mpo na Hassan Kibabe, opérateur culturel local, bana baye batindaka message moko ya makasi, oyo gouvernement elingi ko ignorer. Amileli boye: “Bapesaka nsango ya kimya, mpe ezali nsɔni ete likambo yango esimbami te.”

Na kati ya makambo ya nsɔmɔ ya bitumba, mabina ya bana ya Kivu ezali koyokana lokola kongɛnga ya elikya. Ezali elakiseli ya nguya ya mayele, oyo ekoki kobongola bomoi oyo ebukani na ba ambassadeurs ya nguya ya kimia.